काठमाडौं- गैरकानूनी बाटोबाट अमेरिका गएका ५ नेपालीलाई अमेरिकाले आज (बुधबार) नेपाल फिर्ता (डिपोर्ट) गरेको छ ।

उनीहरुलाई गैरआप्रबासी ठहर गरी नेपाल फर्काइएको हो । उनीहरु लामो समयदेखि अध्यागमनको हिरासतमा थिए ।

डिपोर्ट भएका नेपालीलाई अमेरिकी चार्टर्ड विमानले त्रिभुवन विमानस्थलमा छाडेको थियो । यसरी फर्काइएका नेपालीमा रूकुम स्यालापाखा-९ का नरेन्द्र रेउले, प्रमोदकुमार पुन मगर, बाग्लुङ धम्जाका देवेन्द्रबहादुर क्षेत्री, दाङ घोराहीका अभिश्वर बुढामगर र नवलपरासी कावासोतीका अर्जुन पौडेल क्षेत्री छन्।

उनीहरुसँगै ३ पाकिस्तानी नागरिक पनि रहेको प्रहरीले जनाएको छ । नेपालीलाई छाडेर चार्टर्ड विमान पाकिस्तानीलाई पुर्‍याउन गएको नेपाल प्रहरीको मानव बेचबिखन तथा ओसारपसार व्युरोका प्रमुख बरिष्ठ प्रहरी उपरीक्षक ईश्वरबाबु कार्कीले बताए ।

उनीहरुलाई हतकडी लगाएर ल्याइएको थियो । नेपाल तथा भारतका दलालमार्फत स्थायी आप्रवासको आश्वासन पाएर उनीहरू चोरी बाटो हुँदै अमेरिका पुगेको ब्युरोले जनाएको छ। प्रहरीका अनुसार नेपाल आइपुगेका पीडित युवाले दलालको नाम बताइसकेका छैनन्।

अमेरिका पुग्न लाखौं खर्च गरेको बताएका उनीहरूले त्यहाँ पुगेपछि लामो समय हिरासत बसेको बताएका छन्।