काठमाडौं- चालु आर्थिका वर्षको पाँच महिनामा २७.७७ प्रतिशत मात्र राजस्व संकलन भएको छ ।

महालेखा परीक्षकको कार्यलयका अनुसार पहिलो आर्थिक वर्षको मंसिर मसान्तसम्म ३ खर्ब १७ अर्ब ९४ करोड राजस्व संकलन भएको हाे ।

सरकारले चालु आर्थिक बर्षका लागि ११ खर्ब १२ अर्ब ३ करोड आन्तरिक राजश्व उठाउने लक्ष्य लिएको छ । अर्थ मन्त्रालयका अनुसार चालु आर्थिक बर्षको पाँच महिनामा ४ खर्ब २ अर्ब राजस्व संकलन गर्ने लक्ष्य लिइएको थियो ।

तथ्याङ्क हेर्दा सरकारको लक्ष्यभन्दा ८५ अर्ब कम राजस्व संकलन गरेको देखिएको छ । यो समयमा सरकारले करमार्फत २ खर्ब ८५ अर्ब राजस्व संकलन गरेको छ । उक्त रकम वार्षिक लक्ष्यको २८.६० प्रतिशत हो ।

गैरकर राजस्व भने १९.५९ प्रतिशत अर्थात १९ अर्ब राजस्व संकलन गरेको छ । सरकारले आर्थिक वर्षको पहिलो पाँच महिनामा जम्मा विनियोजित बजेटको १७.९६ प्रतिशत मात्रै खर्च गरेको छ ।

महालेखा नियन्त्रकको कार्यलयका अनुसार सरकारले मंसिर मसान्तसम्म जम्मा २ खर्ब ९६ अर्ब ३० करोड रुपैयाँ खर्च गरेको हो ।