चैनपुर– बझाङको बुँगल नगरपालिकाबाट अपहरणमा परेकी भनिएकी सत्तारुढ दल नेपाल कम्युनिस्ट पार्टी (नेकपा)की एक प्रदेश देवकी मल्ल स्थानीय प्रशासनको सम्पर्कमा आएकी छन् ।

बुंगल नगरपालिकाको विजगडा भन्ने ठाउँबाट फर्किदै गर्दा नेकपाकी प्रदेशसभा सांसद देवकी मल्ल सम्पर्कविहीन भएकी थिइन् ।

बझाङ प्रदेशसभा ‘ख’बाट निर्वाचित प्रदेश सांसद मल्ललाई नेत्रबिक्रम चन्द (विप्लव) नेतृत्वको नेकपाका कार्यकर्ताले नियन्त्रणमा लिएका स्थानीयको भनाइ थियो ।

यद्यपि, सम्पर्कविहीन भएको भनिएको करिब ३ घन्टापछि मल्ल आफूहरुको सम्पर्कमा आएको बझाङका प्रमुख जिल्ला अधिकारी सुरेश सुनारले खबरहबलाई जानकारी दिए ।

‘माननीय ज्यू सम्पर्कविहीन भएको भन्ने सूचना आएपछि हामीले उहाँसँग सम्पर्क गर्न खोजेका थियौं,’ प्रमुख जिल्ला अधिकारी सुनारले खबरहबसँग भने, ‘अहिले उहाँ हाम्रो सम्पर्कमा आउनु भएको छ । उहाँसँग मेरो टेलिफोनमा कुराकानी भएको छ ।’

प्रजिस सुनारले सांसद मल्ल जिल्ला सदरमुकाम चैनपुर पुग्न लागेको पनि जानकारी दिए ।

खबरहबको सम्पर्कमा आएका केही स्थानीयले भने मल्लको अपहरण भएको बताएका थिए । मुखमा पट्टी बाँधेर आएका केही व्यक्तिले सांसद मल्ललाई नियन्त्रणमा लगेर गएका एक स्थानीयले खबरहबलाई जानकारी दिएका थिए ।