काठमाडौं– गृहमन्त्री रामबहादुर थापा ‘बादल’ र स्वतन्त्र मधेस गठवन्धनका संयोजक सीके राउतबीच ११ बुँदे सहमतिपत्रमा हस्ताक्षर भएको छ ।

राष्ट्रिय सभामा आयोजित कार्यक्रममा गृहमन्त्री बादल र राउतले सहमतिपत्रमा हस्ताक्षर गरेका हुन् ।

यसअघि गृहमन्त्री बादल र राउतबीच ११ बुँदे समझदारी भएकोमा ‘सहमति कार्यान्वयन हुने’ अर्को बुँदा समावेश गरेर राष्ट्रिय सभामा सम्झौतापत्रमा हस्ताक्षर भएको हो ।

सम्झौतापत्रमा स्वतन्त्र मधेस गठवन्धनले पृथकतावादी गतिविधि परित्याग गरी मुलधारको राजनीतिमा सहभागिता जनाउने उल्लेख छ ।

यस्तै स्वतन्त्र मधेस गठवन्धनका नेता–कार्यकर्तामाथि लगाइएका सबै राजनीतिक मुद्दा फिर्ता गरी प्रहरी हिरासत र थुनामा रहेका सबै कार्यकर्तालाई बिनाशर्त रिहा गर्ने सम्झौता पनि भएको छ ।

स्वतन्त्र मधेस गठवन्धनले पृथकतावादी गतिविधिको प्रचारका लागि प्रचारण्मा ल्याएका किताव, पर्चा, पम्पलेट तथा अनलाईन सामग्री बन्द गर्ने पनि सम्झौता पत्रमा उल्लेख छ । यस्तै स्वतन्त्र मधेस गठवन्धनले यस अघि तयार पारेका यस्ता पर्चा र पम्पलेटको आधारमा सरकारले मुद्दा नचलाउने पनि सम्झौतापत्रमा उल्लेख छ ।