हुम्ला- हुम्लाको सदरमुकाम सिमकोट विमानस्थलको हिउँ पन्छाउन कसैले चासो नदिँदा हवाई उडान अवरुद्ध बनेको छ ।
बिहीबार र शुक्रबार दुई दिन लगातार हिमपात हुँदा हुम्लाबाट अन्तर जिल्ला पुग्ने एकमात्रै हवाई यातायात तीन दिनदेखि अवरुद्ध भएको छ ।
सिमकोट विमानस्थलमा जम्मा भएको हिउँ पन्छाउन यहाँको स्थानीय सरकार, एयरलाइन्सका कर्मचारी मौन बसेका छन् ।
सिमकोट विमानस्थलबाट राजस्व उठाउने सिमकोट गाउँपालिका अहिले हवाई यातायात बन्द हुँदा कुनै चासो नदिएको पाइएको छ ।
गाउँपालिकाले गत वर्षदेखि मानसरोवर कैलाश तथा हुम्लाका अन्य पर्यटकीय क्षेत्रमा घुम्न आउने पर्यटकबाट राजस्व उठाउने गरेको छ ।
तर दुई दिनदेखि लगातार जम्मा भएको हिउँ पन्छाउनमा सिमकोट गाउँपालिकाका जनप्रतिनिधिले कुनै चासो नदिएको देखिएको छ । सधैँ नेपाल प्रहरी, नेपाली सेना, सशस्त्र प्रहरी बलले सिमकोट विमानस्थलको हिउँ पन्छाउनुपर्ने बाध्यता रहेको छ ।
सिमकोट विमास्थलको हिउँ पन्छाउने कार्यमा कसैले चासो नदिँदा जिल्ला पुग्ने र जिल्लाबाट बाहिर जाने यात्रु समस्यामा परेका छन् ।
केही दिनयतादेखि सीता, समिट, ताराले दिनमा दर्जनभन्दा बढी उडान गर्दै आएको भएपनि एयरलाइन्स कर्मचारी पनि हिउँले हवाई उडान अवरुद्ध हुँदा मुखदर्शक भएर बसिरहेका छन् ।
सिमकोट विमानस्थलको हिउँ पन्छाउने गाडी बिग्रँदा विमानस्थलमै थन्किएको छ ।
प्रतिक्रिया