भारत– भारतको जम्मुमा भएको ग्रिनेड आक्रमणमा एक जनाको ज्यान गएको छ । जम्मुको बस स्टेशनमा बिहीबार मध्याह्न १२ बजे भएको ग्रिनेड आक्रमणमा एकजना १७ वर्षे किशोरको मृत्यु भएको भारतीय सञ्चारमाध्यमले जनाएका छन् । मारिनेमा शरिक नाम गरेका किशोर रहेको प्रहरीले जनाएको छ ।

ग्रिनेड आक्रमणमा घाइते भएका उनको उपचारका क्रममा मृत्यु भएको हो । आक्रमणमा अरु ३० जना घाइते भएको अधिकारीले जनाएका छन् । प्रहरीले ग्रिनेड आक्रमण गराउने आक्रमणकारीलाई पक्राउ गरेको जनाएको छ ।

पक्राउ पर्नेमा भारत प्रशासित कश्मीरको कुल्गाम क्षेत्रका यासिर जाभिद भट रहेको प्रहरीले जनाएको छ । सीसीटीभी फुटेज तथा प्रत्यक्षदर्शीको बयानका आधारमा यासिरलाई पक्राउ गरिएको हो ।

यासिरले कश्मीरमा सक्रिय आतंकवादी समूह हिजबुल मुजाहिद्दिनका जिल्ला कमाण्डर फारुख अहमद भटको निर्देशनमा ग्रिनेड आक्रमण गराएको बताइएको छ ।