काठमाडौं– ठूला करदाता कार्यालयले दूरसञ्चार सेवा प्रदायक कम्पनी एनसेलमाथि २२ अर्ब ४४ करोड निर्धारण गरेको छ ।

सर्वोच्च अदालतको फैसलाअनुसार लाभकर निर्धारणको आदेश भएको ठूला करदाता कार्यालय ललितपुरका प्रमुख झलकराम अधिकारीले जानकारी दिए ।

‘सर्वोच्चको आदेशानुसार लाभकरण निर्धारण भइ चुक्ताका लागि आदेश भइसकेको छ,’ ठूला करदाता कार्यालयका प्रमुख अधिकारीले भने, ‘बिहीबार नै एनसेललाई लाभकर निर्धारण भएको आदेश दिइएको छ ।’

सर्वोच्च अदालतले गत भदौमा गरेको फैसलाको पूर्णपाठमा एनसेलसँग २१ अर्ब १० करोड रुपैयाँ कर असुली गर्न भनिएको थियो ।

ठूला करदाता कार्यालयले उक्त फैसलामा उल्लेख भएअनुसार गत वैशाख यताको ब्याज समेत जोडेर २२ अर्ब ४४ करोड रुपैयाँ लाभकर निर्धारण गरेको हो ।