एजेन्सी– अमेरिकाको माथिल्लो सदन सिनेटकी एकजना सिनेटरले अमेरिकी वायुसेनामा कार्यरत रहँदा आफूमाथि बलात्कार भएको खुलासा गरेकी छिन् ।

रिपब्लिकन पार्टीका तर्फबाट एरिजोना राज्यकी सिनेटर मार्था मक्सालीले अमेरिकी वायुसेनामा कार्यरत रहँदा आफूमाथि आफ्ना वरिष्ठ सैन्य अधिकारीले बलात्कार गरेको खुलासा गरेकी हुन् ।

उनले सिनेटको आम्र्ड सर्भिस उपसमितिमा अमेरिकी सेनामा हुने यौन दुव्यवहारबारेको सुनुवाईका क्रममा आफूमाथि पनि बलात्कार भएको खुलासा गरेकी हुन् ।
उनले आफूमाथि बलात्कार गर्ने सैनिक अधिकारीको पहिचान भने खुलाइनन् ।
त्यसअघि गत जनवरीमा एरिजोना राज्यकै अर्की सिनेटर जोनी एन्स्र्टले पनि कलेज पढ्दा आफूमाथि बलात्कार भएको खुलासा गरेकी थिइन् ।
आफूमाथि बलात्कार भएपनि सैनिक प्रणालीमाथि आफ्नो विश्वास नरहेकाले आफूले बलात्कारबारे उजुरी नगरेको समेत बताइन् ।
‘आफूमाथि बलात्कार भएपछि मैले सैनिक सेवा त्याग्नेबारे पनि विचार गरेँ, तर मैले त्यागिन सैनिक सेवालाई निरन्तरता दिइरहेँ ।’ सिनेटर मक्सलीले भनिन् ।
यता अमेरिकी वायुसेनाले भने मक्सलीले वायुसेनामा रहँदाको भोगाइप्रति दुःख व्यक्त गरेको छ ।
२६ वर्ष अमेरिकी वायुसेनामा सेवा गरेकी उनी कम्ब्याटमा लडाकु विमान उडाउने तथा स्क्वाड्रनको कमाण्ड गर्ने पहिलो महिला पाइलट समेत हुन् ।
उनले सन् २०१० मा अमेरिकी वायुसेनाबाट अवकाश लिएकी थिइन् भने सन् २०१४ मा अमेरिकाको तल्लो सदन हाउस अफ रिप्रेनेन्टेटिभमा चुनिएकी थिइन् । एरिजोनाका सिनेटर जोन मेक्केनको निधन भएपछि मेक्केको स्थानमा उनलाई सिनेटर बनाइएको हो ।