काठमाडौं- राष्ट्रपति विद्यादेवी भण्डारीले चार्डपर्वले नेपालीबीच पारस्परिक सम्बन्ध बढाउने बताएकी छन् । आज (बिहीबार) शेर्पालगायत बौद्ध धर्मावलम्बीले नयाँ वर्षका रुपमा मनाउने महान् पर्व ‘ग्याल्बो ल्होसार’का अवसरमा शुभकामना दिँदै राष्ट्रपतिले चार्ड पर्वले सबैमा भ्रातृत्व जगाउने बताएकी छन् ।

राष्ट्रपतिले जारी गरेको शुभकामना सन्देशमा विविधताले भरिएको नेपाली समाजका यस्ता चाडपर्व साझा सम्पत्ति भएको उल्लेख गरिएको छ । यस्ता पर्वले नेपाल र नेपालीबीच बन्धुत्व र पारस्परिक सम्बन्ध बढाउनाका साथै एकार्काको संस्कृतिको सम्मानसहित आपसी एकता, सद्भाव र सहिष्णुतालाई अक्षुण राख्न सघाउ पुग्ने उनको विश्वास छ ।

राष्ट्रपतिले सन्देशमार्फत सबै नेपालीमा नयाँ उमङ्गसहित हर्षाेल्लास, शान्ति र भ्रातृत्वको सन्देश फैलाउन सकोस् भन्ने शुभेच्छा व्यक्त गर्दै सम्पूर्ण नेपालीलाई शुभकामना दिएकी छन् ।