काठमाडौं- इंग्लिस प्रिमियर लिग क्लब आर्सनलले प्रशिक्षक उनाइ एमरी बर्खास्त भएका छन् । एमरी १८ महिना आर्सनलको प्रशिक्षकका रुपमा रहेपछि बर्खास्त भएका हुन् ।

स्पेनिस एमरी १८ महिनाअघि फ्रान्सेली क्लब पेरिस सेन्ट–जर्मेन (पिएसजी) बाट आर्सनलमा आएका हुन् । उनले पिएसजीलाई फ्रेन्च लिग वानको उपाधि दिलाएका थिए ।

त्यसअघि सेभिल्लाको प्रशिक्षकमा रुपमा उनले क्लबलाई तीनपटक युरोपा लिगको उपाधि जितेका थिए । आर्सेन वेङ्गरले छोडेपछि एमरी सन् २०१८ को मे मा आर्सनलको प्रशिक्षकमा नियुक्त भएका थिए ।

क्लबको प्रदर्शन तथा नतिजा आश गरिएको भन्दा तलको रहेकाले प्रशिक्षकलाई बर्खास्त गरिएको आर्सनलले जनाएको छ ।

आर्सनलले पछिल्ला सात खेलमा जित निकाल्न सकेको छैन र गएको बिहीबार युरोपा लिग अन्तर्गत फ्र्यांकफर्टसँग भएको खेलमा २–१ ले पराजित भयो । आर्सनल अहिले १३ खेलबाट १८ अंकसहित आठौँ स्थानमा छ ।