काठमाडौं– टीकापुर हत्याकाण्डमा दोषी ठहर भएसँगै निलम्बित सांसद रेशम चौधरीको पद खारेज हुने भएको छ ।

जेलमै रहेको अवस्थामा संसदको शपथ लिएका रेशम चौधरीलाई जन्मकैदको फैसला कैलाली जिल्ला अदालते गरेसँगै उनको पद खारेज हुने भएको हो ।

संघीय संसदका प्रवक्ता रोजनाथ पाण्डेले नैतिक पतन देखिने फौजदारी कसुर प्रमाणित भएकाले सांसद पद स्वतः खारेज हुने बताए ।
‘अदालतले दोषी ठहर गरेपछि सांसद रहने कानूनी व्यवस्था छैन’ प्रवक्ता पाण्डले भने,‘संसदको नियमावली अनुसार उनी पदमा रहन मिल्दैन ।’
फरार रहेको अवस्थामा नै चुनाव लडेका चौधरीले कैलाली क्षेत्र नम्बर १ बाट चुनाव जितेका थिए ।

७ भदौं २०७२ मा नाबालकसहित आठ जनाको हत्या भएको मुद्दामा चौधरीसहित ५८ जनालाई विपक्षी बनाइएको थियो ।

बुधबार कैलाली जिल्ला अदालतले टीकापुर काण्डमा सांसद रेशम चौधरीसहित ११ जनालाई जन्मकैदको फैसला सुनाएको थियो ।