भोजपुर– पौवादुङ गाउँपालिका–१ श्यामशिलामा शनिबार हुने उपनिर्वाचनको सम्पूर्ण तयारी पूरा भएको छ । उपनिर्वाचनलाई लक्ष्य गरी सुरक्षाकर्मी परिचालन गरिएको छ ।

प्रमुख जिल्ला अधिकारी नूरहरि खतिवडाले आवश्यक सम्पूर्ण सुरक्षा प्रबन्ध मिलाइएको जानकारी दिए । निर्वाचनको बेला सवारीसाधनका चालकलाई अनुमतिपत्रको व्यवस्था गरिएको छ ।

उनले भने, ‘सुरक्षाको सबै प्रबन्ध मिलाएका छौँ, मतदाताले ढुक्क भएर मतदान गर्न सक्ने अवस्था छ ।’ राजनीतिक दलसँगको समन्वयमा वडावासीबाहेक बाहिरबाट आउने नागरिकको प्रवेशमा रोक लगाइएको उनले बताए ।

प्रहरी नायब उपरीक्षक नरबहादुर सलामी मगरका अनुसार उपनिर्वाचनलाई लक्ष्य गरी नेपाल प्रहरी र सशस्त्र प्रहरी परिचालन गरिएको जानकारी दिए । निर्वाचन हुने ठाउँमा सशस्त्र प्रहरीको अस्थायी क्याम्प राखिएको छ । मतदानस्थलको बाहिरी घेराको सुरक्षाको जिम्मा नेपाली सेनालाई दिइएको छ ।