काठमाडौँ– भौतिक पूर्वाधार तथा यातायात मन्त्री सुनिल लम्सालले मुलुकका आठ प्रमुख शहरमा फ्लडलाइट सहित कम्तीमा ८ हजार दर्शक क्षमताका क्रिकेट रंगशाला निर्माणको प्रक्रिया अघि बढाएको बताएका छन् ।

आज सामाजिक सञ्जाल फेसबुकमार्फत उनले नेपाल प्रिमियर लिग (एनपीएल) को तेस्रो संस्करण सुरु हुन लागेकोमा आयोजकलाई सफलताको शुभकामना दिँदै उनले ‘होम एन्ड अवे’ आधारमा खेल सञ्चालन गर्न सकिने गरी तीन वर्षभित्र निर्माण सम्पन्न गर्ने लक्ष्य रहेको जनाएका छन् ।

उनले आयोजनाले एनपीएललाई देशभर विस्तार गर्दै नेपाली क्रिकेटको विकासमा नयाँ आयाम थप्ने विश्वास समेत व्यक्त गरेका छन् ।

उनले भनेका छन्, ‘तीन वर्षभित्र निर्माण सम्पन्न गर्ने लक्ष्यसहित अघि बढाइएको योजनाले एनपीएललाई देशभर विस्तार गर्दै नेपाली क्रिकेटको विकासमा नयाँ आयाम थप्ने विश्वास लिएका छौँ। क्रिकेट संघ (क्यान)ले पनि सोही अनुरूप आवश्यक तयारी अघि बढाओस् ।’

नेपाल प्रिमियर लिग (एनपीएल) को तेस्रो संस्करण आजदेखि सुरु हुँदैछ।