काठमाडौँ – नेपाल प्रिमियर लिग (एनपिएल) को टोली सुदूरपश्चिम रोयल्सले आफ्नो अफिसियल सपोर्ट स्टाफको घोषणा गरेको छ। टोलीले पाकिस्तानका पूर्वकप्तान तथा चर्चित क्रिकेट प्रशिक्षक मिस्बाह उल हकलाई मुख्य प्रशिक्षक (हेड कोच) मा नियुक्त गरेको छ।

रोयल्सले सामाजिक सञ्जालमार्फत आफ्नो पूरा प्राविधिक तथा व्यवस्थापकीय टोलीको नामावली सार्वजनिक गरेको हो। टोलीको निर्देशक (टिम डिरेक्टर) मा नेपाली क्रिकेटका अनुभवी पूर्वमुख्य प्रशिक्षक जगत टमाटा रहेका छन्। त्यस्तै, सहायक प्रशिक्षकको जिम्मेवारी देव नारायण झालाई दिइएको छ।

टोलीको व्यवस्थापकीय जिम्मेवारीअन्तर्गत टिम म्यानेजरमा सुनिल थापा र लजिस्टिक्स म्यानेजरमा सौरभ ओझा रहेका छन्। त्यसैगरी स्ट्रेंथ एन्ड कन्डिसनिङ कोचमा जिवेश बली र फिजियोमा नविन विश्वकर्मालाई नियुक्त भएका छन् ।

पाकिस्तानलाई टेस्ट वरीयताको शीर्ष स्थानमा पुर्‍याउन सफल मिस्बाहको आगमन र अनुभवी नेपाली प्राविधिकको साथले सुदूरपश्चिम रोयल्सको यात्रा थप मजबुत हुने अपेक्षा गरिएको छ। लगातार दुई सिजनको उपविजेता सुदूरपश्चिमले एनपिएलको उद्घाटन खेलमा साविक विजेता लुम्बिनी लायन्ससँग सोमबार प्रतिस्पर्धा गर्दै छ । यो खेल नेपाली समय अनुसार साँझ ५ बजे सुरु हुनेछ ।