सिड्नी- पश्चिमी अस्ट्रेलियाको जेराल्डटनमा एक व्यक्तिमाथि गोली प्रहार भएपछि प्रहरीले पाँच जनालाई पक्राउ गरेको छ।

पश्चिमी अस्ट्रेलिया प्रहरीले बुधबार बिहान करिब १२ः५० बजे जेराल्डटन सहरनजिकै गोली चलेको सूचना पाएपछि आपतकालीन टोलीसहित ठूलो सङ्ख्यामा प्रहरी परिचालन गरेको जनाएको छ। जेराल्डटन पर्थ सहरबाट करिब ३७० किलोमिटर उत्तरमा पर्छ।

घटनास्थलमा प्रहरीले ३२ वर्षीय एक पुरुषलाई गोली लागेको अवस्थामा फेला पारेको थियो। उहाँलाई गम्भीर तर ज्यानलाई खतरा नरहेको चोटसहित उपचारका लागि अस्पताल लगिएको प्रहरीले जनाएको छ।

घटनापछि प्रहरीले स्थानीय बासिन्दाको सुरक्षाका लागि सूचना जारी गर्दै आसपासको क्षेत्रमा खोजी अभियान सञ्चालन गरेको थियो। विशेष सुरक्षा टोलीसहित ठूलो संख्यामा प्रहरी परिचालन गरिएको थियो।

प्रहरीका अनुसार बुधबार बिहान जेराल्डटनको पूर्वी क्षेत्रमा पाँच जनालाई पक्राउ गरिएको हो। घटनाबारे अनुसन्धान जारी रहेको प्रहरीले जनाएको छ।

प्रहरीले स्थानीय बासिन्दालाई सतर्क रहन तथा कुनै शंकास्पद गतिविधि देखिएमा तत्काल जानकारी गराउन आग्रह गरेको छ।