बाजुरा– पूर्वी–उत्तरी क्षेत्र जोड्ने मार्तडी–कोल्टी सडकखण्ड तीन महिनापछि खुलाउने काम सुरु गरिएको छ । वर्षायाम सुरु भएसँगै असार दोस्रो सातादेखि अवरुद्ध रहेको सडकखण्ड आजबाट सञ्चालनमा ल्याउनेगरी काम सुरु गरिएको हो । 

प्रमुख जिल्ला अधिकारी डोरेन्द्र निरौलाले पूर्वाधार विकास कार्यालय अछामसँगको समन्वयमा बडीमालिका नगरपालिकाको जेसीबी प्रयोग गरेर सडक खुलाउने काम सुरु गरिएको जानकारी दिए । उनका अनुसार सडकखण्डका विभिन्न स्थानमा पहिरो हटाउने तथा सडक मर्मत गर्ने काम सम्पन्न भएर अबको केही दिनमै सञ्चालन हुनेछ । 

मार्तडी–कोल्टी सडकखण्डका विभिन्न स्थानमा लगातारको वर्षाका कारण पहिरो खस्नुका साथै खोलामा पानीको बहाव बढेपछि सडक पूर्ण रूपमा बन्द भएको थियो । 

सडक बन्द हुँदा पूर्वी उत्तरी भेगका चार पालिकासहित छिमेकी हुम्ला, मुगुलगायत जिल्लाका नागरिकले आवतजावतमा सास्ती खेप्दै आएका छन् ।

सडक अवरुद्ध भएपछि यात्रुले मार्तडीबाट कोल्टी पुग्न कम्तीमा रु दुई हजारसम्म भाडा तिर्नुपर्थ्यो । सडक बन्दकै कारण बीच बाटोमै सवारी रोकिएका छन् भने दैनिक उपभोग्य वस्तु र निर्माण सामग्रीको ढुवानीसमेत प्रभावित भएको छ । 

बडीमालिका नगरपालिका–८ को बाउली खोला र वडा नं ७ को रजातोली खोलामा पुल नहुँदा तथा जिल्ली, रजातोलीलगायतका स्थानमा पटकपटक पहिरो खस्ने समस्याले हरेक वर्ष सडक अवरुद्ध हुँदै आएको छ । 

बडीमालिका नगरपालिकाका नगरप्रमुख अमरबहादुर खड्काले गत वर्ष अनाई खोलामा र यस वर्ष बुढीनन्दा नगरपालिकाको दानसाँघु खोलामा पुल बनेपछि केही सहजता आएको भए पनि बाउली खोलाको पुल पाँच वर्षदेखि अधुरै रहेको बताए। उनका अनुसार रजातोलीमा पुल निर्माण भइरहेको छ तर बाउलीमा निर्माण कम्पनीको ढिलासुस्तीका कारण नागरिकले बर्सेनि सास्ती खेप्नुपरेको जानकारी दिए । 

सडक अवरुद्ध हुँदा पूर्वी–उत्तरी भेगका किसानको स्याउ बजारसम्म पुग्नसकेको छैन । स्याउ किसान उज्ज्जल रावतले  कृषि  सडक बन्द हुँदा स्याउ ढुवानी गरेर बजारसम्म पुर्याउन नसकिएको बताए । 

उनका अनुसार धेरै किसानले स्याउ पिठ्युँमा बोकेर सदरमुकाम मार्तडी ल्याउने गरेका छन् भने केहीले कर्णाली करिडोर हुँदै धनगढी र नेपालगन्जसम्म पुर्याउने गरेका छन् । 

करिब २७ वर्षअघि शिलान्यास भएको मार्तडी–कोल्टी सडकखण्ड अझै पूर्ण रूपमा स्तरोन्नति हुनसकेको छैन । सुदूरपश्चिम प्रदेश सरकारको बहुवर्षीय योजनामा रहेको सडक कालोपत्र र स्तरोन्नतिमा भएको ढिलाइका कारण हरेक वर्ष वर्षायाममा सडक अवरुद्ध हुँदा नागरिकले सास्ती व्यहोर्नुपर्ने अवस्था दोहोरिँदै आएको छ । 

पूर्वाधार विकास कार्यालय अछामकाअनुसार मार्तडी–कोल्टी सडकमा गत आर्थिक वर्षमा ठेकेदार कम्पनीले काम नगर्दा रु २० करोड बजेट फिर्ता भएको थियो ।
 
सडकखण्ड निर्माण तथा स्तरोन्नतिको जिम्मा पाएको पीएस बानियाँ निर्माण सेवाले काम नगर्दा गत वर्षमात्र होइन, अघिल्ला वर्षहरूमा पनि ठेकेदारको ढिलासुस्तीका कारण करोडौँ रुपैयाँ बजेट फिर्ता हुँदै आएको छ ।