काठमाडौँ– लगातारको वर्षाले खेल प्रभावित हुँदा समूह विजेता बन्दै क्वाटरफाइनल पुगेको नेपाल एसियन गेम्सबाट बाहिरिएको छ ।

मंगलबारका लागि तोकिएको खेल वर्षाका कारणा हुन नसक्दा एउटा पनि बल नखेली नेपाल प्रतियोगिताबाट बाहिरिएको हो । श्रीलंका भने सिधै सेमिफाइनलमा पुगेको छ । आईसीसी वरियताका आधारमा श्रीलंका सेमिफाइनल पुगेको हो ।

आइसिसीको पछिल्लो पुरुष टी-२० वरीयतामा श्रीलंका नवौँ स्थानमा छ भने नेपाल १४ औँ स्थानमा छ। यही वरीयताका आधारमा श्रीलंका सेमिफाइनल पुगेको हो ।

समूह ‘ए’ मा रहेको नेपालले पहिलो खेलमा अफगानिस्तानलाई पाँच विकेटले हराएको थियो भने आयोजक जापानसँगको दोस्रो खेल नतिजाविहीन हुँदा तीन अंक जोड्दै समूह विजेता बनेको थियो ।

समूह चरणका दुई खेलमा नेपालको लय

जापानविरुद्ध नेपालका सन्दीप जोरा र लोकेश बमले नटआउट अर्धशतक बनाएको खेलमा चार विकेटको क्षतिमा १५ ओभरमा नेपालले १४९ रन बनाएको थियो । तेस्रो क्रममा ब्याटिङ गरेका सन्दीपले पाँच चौका र तीन छक्काको मद्दतमा ३२ बल सामना गर्दै ५७ रन बनाए । पाँचौँ क्रममा आएका लोकेश बमले आक्रामक ब्याटिङ गरे । उनले ६ छक्का र एक चौकाको मद्दतमा २२ बल सामना गर्दै अन्तिम बलमा ५२ रन जोडेर अर्धशतक पूरा गरे ।

नेपालका लागि ओपनर आसिफ शेखले १५ बलमा २१ रन बनाउँदा कुशल भुर्तेल १२ बल खेलेर चार रनमा आउट भए भने कुशल मल्ल र गुल्सन झा दुई-दुई रनमा आउट भए ।

अफगानिस्तानविरुद्ध पाँच विकेटको जित

समूह चरणको पहिलो खेलमा टस जितेर अफगानिस्तानले पहिला ब्याटिङ गर्दा नेपालले बलिङ गरेको थियो । पहिलो खेलमा टेस्ट राष्ट्रलाई पूरै २० ओभरमा १०२ रनमा रोकेको नेपाल पाँच विकेटले विजयी भएको थियो । नेपालविरुद्ध अफगानिस्तानका तीन ब्याटरबाहेक कसैले दोहोरो अंकमा रन जोड्न सकेका थिएनन् । १०३ रनको लक्ष्य नेपालले १७ ओभर २ बलमा पाँच विकेट गुमाएर पूरा गरेको थियो ।