स्याङ्जा । चार दिनदेखिको अविरल वर्षापछि आएको बाढीबाट विस्थापित स्यंगल्याङ नगरपालिका–५ सेतीबेणीका ३२ परिवारलाई राहत सामग्री वितरण गरिएको छ ।

बाढीका कारण यहाँ २२ कच्ची घर पूर्ण रूपमा क्षतिग्रस्त भएका छन् भने १० पक्की घरमा आंशिक क्षति पुगेको छ ।

सेतीबेणीमा ३७ पुरुष, ५१ महिला र १३ बालबालिकासहित १०१ जना प्रभावित भएका छन् । तीमध्ये ४८ जना विस्थापितलाई पर्वतको बिहादी गाउँपालिका–६ स्थित सेतीबेणी शालिग्राम माध्यमिक विद्यालयमा राखिएको जिल्ला प्रशासन कार्यालयका सहायक प्रमुख जिल्ला अधिकारी प्रेम सुवेदीले जानकारी दिए । अन्य विस्थापित भने आफन्तको घरमा बसेका छन् ।

नेपाल रेडक्रस सोसाइटी स्याङ्जाले बाढीपीडित परिवारलाई २४ थान त्रिपाल, २५ थान म्याट्रेस, ५० थान कम्बल, ३० प्याकेट मास्क, पाँच रोल डोरी, २० थान किशोरी कीट तथा २२ थान सरसफाइ सामाग्री उपलब्ध गराएको छ ।

त्यस्तै, जिल्ला प्रशासन कार्यालयले चार कार्टुन चाउचाउ, स्यानिटरी प्याड चार कार्टुन, चार कार्टुन खानेपानी, कोलगेट तथा टुथब्रस ७०/७० थान, आटा २० किलो, दाल २० किलो, नुन चार पोका, तीन थान ब्ल्याङ्केट, तीन प्याकेट बिस्कुट र तोरीको तेल एक प्याकेट साथै मेडिकल कीट, साबुन, स्याम्पु, चाउचाउ, चना, दाल, पास्तालगायतका सामाग्री वितरण गरेको छ ।

यसैबीच प्रमुख जिल्ला अधिकारीसहितको टोलीले सेतीबेणी पुगेर बाढीबाट प्रभावित क्षेत्र तथा विस्थापित परिवारको अवस्थाबारे अनुगमनसमेत गरेको छ ।