लन्डन– बेलायतमा अमेरिकी सेनाले प्रयोग गर्दै आएको फेयरफोर्ड वायुसेना अड्डा नजिकैबाट पाँच जना पुरुष पक्राउ परेका छन्।

बेलायती प्रहरीले उनीहरूलाई आतंकवादी गतिविधिको तयारी गरेको आशंकामा पक्राउ गरिएको जनाएको छ। प्रहरीका अनुसार आइतबार बिहान तीन वटा शंकास्पद गाडी वायुसेना अड्डातर्फ अघि बढिरहेको सूचना प्राप्त भएपछि अनुसन्धान सुरु गरिएको थियो।

फेयरफोर्ड वायुसेना अड्डा बेलायतको स्वामित्वमा रहे पनि अमेरिकी सेनाले सञ्चालन गर्दै आएको छ। इरानसँगको युद्धका क्रममा अमेरिकी सैन्य गतिविधिका लागि समेत उक्त अड्डा प्रयोग हुँदै आएको बताइएको छ।

पक्राउ परेका व्यक्तिहरूको इरानसँग कुनै सम्बन्ध छ कि छैन भन्नेबारे पनि अनुसन्धान भइरहेको अधिकारीहरूले बताएका छन्। यद्यपि, उनीहरूको उद्देश्य र घटनामा वास्तविक भूमिकाबारे अहिलेसम्म स्पष्ट भइसकेको छैन।

बेलायती अधिकारीहरूले घटनालाई राष्ट्रिय सुरक्षासँग सम्बन्धित विषयका रूपमा लिएर अनुसन्धान अघि बढाइरहेका छन्। पक्राउ परेकाहरूमाथि हालसम्म कुनै औपचारिक आरोप पुष्टि गरिएको छैन।