काठमाडौँ – असोज ८ गतेदेखिको निरन्तर हावाहुरी, भारी वर्षा र ठाउँ-ठाउँमा गएको बाढी-पहिरोका कारण नेपाल टेलिकम (कम्पनी) का विभिन्न स्थानका सेवाहरू अवरुद्ध हुन पुगेका छन्।

सडक सञ्जालमा आएको अवरोध, अप्टिकल फाइबरमा क्षति, विद्युत् आपूर्ति बन्द हुनुका साथै हिमपात र बादलका कारण सोलार साइटहरूको प्रभावकारिता घट्दा सेवा निरन्तरतामा कठिनाइ भएको छ।

कम्पनीका अनुसार प्राविधिक रूपमा सिस्टमबाटै समाधान गर्न सकिने मर्मतका कामहरू र सम्भव भएका स्थानहरूमा भौतिक मर्मत कार्य निरन्तर भइरहेको छ। मौसममा सुधार आउनासाथ खटिनका लागि प्राविधिक टोलीहरूलाई तयारी अवस्थामा राखिएको कम्पनीले जनाएको छ।

सेवा अवरुद्ध हुँदा ग्राहकवर्गमा पर्न गएको असुविधाप्रति क्षमा माग्दै कम्पनीले यस कठिन परिस्थितिमा देखाएको धैर्यताका लागि आभार व्यक्त गरेको छ।