काठमाडौं– राष्ट्रिय सभाका सांसदहरूले चाडपर्व नजिकिँदै गर्दा बजारमा खाद्यान्न तथा अत्यावश्यक वस्तुको आपूर्ति सहज बनाउन सरकारको ध्यानाकर्षण गराएका छन् ।

राष्ट्रिय सभाको आजको बैठकको शून्य समयमा सांसद सोनाम गेल्जेन शेर्पाले चाडपर्वका बेला अत्यावश्यक वस्तुको आपूर्ति सहज बनाउन, बजार अनुगमन प्रभावकारी बनाउन तथा कालोबजारी नियन्त्रण गर्न सरकारसँग माग गरे। उनले सहज रूपमा अत्यावश्यक वस्तु उपलब्ध गराई जनतालाई राहत दिन आग्रह गरे।

सांसद भुवनबहादुर सुनारले ग्रेजोन मिडियामा नेपालसम्बन्धी प्रकाशित समाचारबारे सरकारले स्पष्ट पार्नुपर्ने माग गरे ।

सांसद मदनकुमारी शाह(गरिमा)ले जापानका लागि राजदूत सिफारिस भएका व्यक्तिको जापानमा ‘पीआर’ रहेको भन्ने समाचार सार्वजनिक भएको उल्लेख गर्दै त्यसबारे सत्यतथ्य जानकारी गराउन सरकारसँग माग गरेकी छन्।

सांसद युवराज शर्माले शिक्षा, स्वास्थ्य, व्यापार तथा जनताको सुरक्षाका क्षेत्रमा प्रभावकारी काम गर्न सरकारको ध्यानाकर्षण गराए।

सांसद राजेन्द्रलक्ष्मी गैरेले केही दिनअघि त्रिपुरेश्वर चोकमा चालकसँग भएको विवादपछि चालकले आत्मदाह गरेको घटनाबारे सरकारसँग स्पष्ट जानकारी माग गरे। उनले यस्तो अवस्थामा राज्यका निकायले संवाद र समन्वयमार्फत समस्या समाधानका लागि पहल गर्नुपर्ने बताए 

सांसद सुरेशकुमार आलेमगरले भोटेकोशीमा आएको बाढी जलवायु परिवर्तनका असरका कारण भएको उल्लेख गर्दै जलवायु अनुकूलनका क्षेत्रमा स्थानीय आदिवासी जनजातिसँग रहेका सीप, ज्ञान र अनुभवको उपयोग गर्नुपर्नेमा जोड दिए।