टोकियो– जापानको पूर्वी क्षेत्रमा टाइफुन डुजुआनका कारण परेको भारी वर्षापछि आएको बाढी र पहिरोमा परी कम्तीमा नौ जनाको मृत्यु भएको छ भने चार जना अझै बेपत्ता छन्।

सोमबार कान्तो क्षेत्रमा परेको अत्यधिक वर्षाले टोकियो आसपासका विभिन्न स्थानमा बाढी र पहिरो आएको थियो। स्थानीय सञ्चारमाध्यमका अनुसार चिबा प्रिफेक्चरमा मात्रै छ जनाको मृत्यु भएको छ।

मृतकमध्ये ५० वर्ष आसपासका एक पुरुष पहिरोले थुपारेको माटो र भग्नावशेष हटाउने क्रममा भारी मेसिन सञ्चालन गरिरहेका बेला बाँसघारीमा खसेर मृत्यु भएको जनाइएको छ। त्यस्तै, बाढीमा डुबेको एउटा सवारीसाधनभित्र एक पुरुषको शव फेला परेको छ।

कानागावा प्रिफेक्चरमा तीन जनाको मृत्यु भएको छ। तीमध्ये ६० वर्ष आसपासकी एक महिलाको घरमा पहिरो खस्दा माटोले घर पुरिएपछि मृत्यु भएको बताइएको छ। बेपत्ता चार जनाको खोजी तथा उद्धारका लागि प्रहरी र अग्निनियन्त्रकहरूले अभियान जारी राखेका छन्।

टाइफुन डुजुआन सोमबार जापानको पूर्वी प्रशान्त तटीय क्षेत्रमा पुगेपछि कान्तो क्षेत्र र इजु द्वीपसमूहमा रेकर्डस्तरको वर्षा भएको थियो। भारी वर्षाका कारण विभिन्न स्थानमा पहिरो खस्नुका साथै नदीमा बाढी आएपछि टोकियो आसपासका क्षेत्र प्रभावित भएका छन्।

चिबा, कानागावा र इबाराकी प्रिफेक्चरमा हालसम्म ५०० भन्दा बढी भवन ध्वस्त, क्षतिग्रस्त वा बाढीबाट प्रभावित भएका छन्। बुधबार बिहान ६ बजेसम्मको विवरणअनुसार चिबा र कानागावा प्रिफेक्चरका २४ हजार ७०० भन्दा बढी घरपरिवार विद्युत्विहीन रहेका छन्।