न्युयोर्क – संयुक्त राष्ट्रसंघको ८१औँ महासभाका क्रममा परराष्ट्रमन्त्री शिशिर खनाल र पोर्चुगलका विदेशमन्त्री पाउलो रान्जेलबीच द्विपक्षीय भेटवार्ता भएको छ। राष्ट्रसंघ मुख्यालयमा भएको उक्त भेटमा दुई देशबीचको बढ्दो मैत्रीपूर्ण तथा सहयोगात्मक सम्बन्धप्रति दुवै पक्षले सन्तोष व्यक्त गरेका छन्।

भेटका क्रममा दुवै देशका मन्त्रीहरूबीच आपसी हितका विविध क्षेत्रमा द्विपक्षीय सहकार्यलाई थप विस्तार र सुदृढ बनाउने उपायहरूबारे गहन छलफल भएको छ।

नेपाल र पोर्चुगलबीचको द्विपक्षीय सम्बन्धलाई थप गतिशील बनाउँदै पारस्परिक लाभका क्षेत्रहरूमा आगामी दिनमा सहकार्यलाई अझ मजबुतका साथ अघि बढाउने प्रतिबद्धता दुवै पक्षले व्यक्त गरेका छन्।