तेहरान- इरानको इस्लामिक रिभोलुसनरी गार्ड्स कोर्प्स (आईआरजीसी) ले अमेरिकाले आफ्नो देशमाथि पुनः आक्रमण गरे नयाँ लक्ष्यमा प्रहार गर्ने र नयाँ क्षमताका हतियार तैनाथ गर्ने चेतावनी दिएको छ।

आईआरजीसीका प्रवक्ताले सोमबार जारी गरेको विज्ञप्तिमा अमेरिकाबाट नयाँ आक्रमण भए इरानको प्रतिरक्षा तथा जवाफी कारबाहीमा ‘महत्त्वपूर्ण परिवर्तन’ हुने बताएका छन् ।

‘हामी युद्धभूमिमा नयाँ क्षमता भएका थप हतियारहरू भित्र्याउनेछौँ, जसले विश्वलाई चकित पार्नेछ,’ उनले भने।

आईआरजीसीले इरानले यसअघि आक्रमण नगरेका नयाँ लक्ष्यहरू पहिचान गरेको जनाउँदै दीर्घकालीन युद्धका लागि समेत आफू तयार रहेको बताएको छ।

सरकारी टेलिभिजनका अनुसार शनिबार इरानी सेनाको केन्द्रीय कमाण्डले अमेरिकाले तेहरानविरुद्ध नयाँ कारबाहीको योजना बनाइरहेको दाबी गरेको थियो। यद्यपि, त्यसबारे विस्तृत विवरण सार्वजनिक गरिएको थिएन।

गत महिनाको अन्त्यमा तनाव बढेपछि पछिल्ला दिनमा अमेरिका र इरानबीचको सैन्य गतिविधि केही मत्थर भएको देखिए पनि तनाव पूर्ण रूपमा अन्त्य भएको छैन। तेहरानले होर्मुज जलमार्गमा व्यावसायिक जहाजलाई लक्षित गरी छिटपुट आक्रमण जारी राखेको छ।

दुवै पक्षले एकअर्कामाथि दबाब बढाउने प्रयासस्वरूप उक्त रणनीतिक जलमार्गमा नाकाबन्दीसम्बन्धी कदम जारी राखेका छन्।

यसैबीच, द्वन्द्व यमनसम्म पनि फैलिएको छ। इरानसमर्थित हुथी विद्रोहीहरूले साउदी अरबसमर्थित सरकारबाट थप भूभाग आफ्नो नियन्त्रणमा लिएको दाबी गर्दै आएका छन्। हुथीहरूले साउदी अरबको राजधानी रियादसहित विभिन्न क्षेत्रमा समेत आक्रमण गर्दै आएका छन्।