काठमाडौं- राहदानी विभागअगाडि चालकले बसभित्रै आगो लगाएर आत्मदाहको प्रयास गरेपछि राहदानी वितरण कार्य रोकिएको छ । त्रिपुरेश्वरस्थित राहदानी विभाग परिसर अगाडिको सडकमा भएको बस आगलागीका कारण विभागको राहदानी छपाई तथा वितरण कार्य प्रभावित भएको हो ।

आगलागीका कारण विभागमा प्रवाह हुने विद्युत र इन्टरनेट सेवामा अवरोध सिर्जना भएपछि राहदानी छपाई र वितरणमा कठिनाई उत्पन्न भएको विभागले जनाएको छ । परराष्ट्र मन्त्रालय अन्तर्गतको राहदानी विभागले जरुरी सूचना जारी गर्दै आवेदन दिइसकेका सेवाग्राहीहरूलाई धैर्यधारण गरी सहयोग गरिदिन आग्रह गरेको छ।

प्राविधिक समस्याका कारण वितरणमा बाधा पुगे पनि राहदानी आवेदन संकलन कार्य भने पूर्ववत् रूपमै सुचारु रहने विभागले स्पष्ट पारेको छ। उत्पन्न समस्याको समाधान हुनासाथ राहदानी वितरण सेवा पुनः नियमित हुने राहदानी विभाग, त्रिपुरेश्वरले जनाएको छ।