काठमाडौं– काठमाडौंको रत्नपार्क लगायत क्षेत्रमा लागू औषध बिक्री गर्ने गिरोहका सदस्य पक्राउ परेका छन् ।

प्रहरीको लागू औषध नियन्त्रण ब्यूरोबाट खटिएको टोलीले लामो समयदेखिको अनुसन्धानपछि रत्नपार्क लगायत काठमाडौंका शहरी क्षेत्रमा लागू औषध बिक्री गर्ने ३ जनालाई पक्राउ गरेको छ ।

लागू औषध नियन्त्रण ब्यूरोबाट ग्राहकको रुपमा गएको प्रहरी टोलीले उनीहरुलाई पक्राउ गरेको हो । पक्राउ पर्नेमा ३६ वर्षीया महिलासहित २ पुरुष छन् ।

प्रहरीका अनुसार मकवानपुरको थाहा नगरपालिका घर भएका ५५ वर्षीय रमेश शिवभक्ति, मकवानपुरकै इन्द्रसरोवर गाउँपालिका घर भएकी ३६ वर्षीया सुनिता गोले र काभ्रेको चन्द्रोदय गाउँपालिका घर भएका २४ वर्षीय धनबहादुर वाइवा रत्नपार्क क्षेत्रबाट पक्राउ परेका हुन् ।

प्रहरीले ५५ वर्षीय शिवभक्तिको साथबाट डाईजेपाम १९४ एम्पुल, ब्रुफेनोर्फिन १९० एम्पुल र फेनारगन १८९ एम्पुल बरामद गरेको छ ।

यस्तै, सुनिता र धनबहादुरको साथबाट डाईजेपाम १४८७ एम्पुल, ब्रुफेनोर्फिन १५६४ एम्पुल, फेनारगन १५७० एम्पुल र लागू औषध नाईट्रोजेपाम (नाईट्रोभेट) ५५५० ट्याब्लेट बरामद भएको ब्यूरोले जानकारी दिएको छ ।

पक्राउ परेका रमेश शिवभक्ती र धनवहादुर वाईवा यसअघि पनि लागू औषध कारोवारमा संलग्न रहेका पाइएको छ । उनीहरू नेपाल भारतको सिमा नाकाबाट नियन्त्रित मनोद्विपक पदार्थ काठमाण्डौ भित्र्याउने मुख्य व्यक्तिहरु रहेको प्रारम्भिक अनुसन्धानबाट खुल्न आएको प्रहरीको भनाइ छ ।

पक्राउ परेका तीनै जनाविरुद्ध लागू औषध नियन्त्रण ऐन, २०३३ बमोजिम मुद्दा दर्ता गरी आवश्यक अनुसन्धान भइरहेको ब्यूरोले जनाएको छ ।