काठमाडौं– राष्ट्रियसभा अध्यक्ष नारायण प्रसाद दाहालले नेपाल र चीनबीचको सम्बन्ध हजारौँ वर्ष पुरानो रहेको बताएका छन् । 

शुक्रबार काठमाडौंमा चिनियाँ यात्री तथा भिक्षु ह्वेन साङद्वारा लिखित पुस्तक ‘महान ताङको पश्चिमी क्षेत्रको अभिलेख’ को नेपाली संस्करणको लोकार्पण गर्दै अध्यक्ष दाहालले नेपाल र चीनबीचको सम्बन्ध कूटनीतिक स्थापना हुनुभन्दा हजारौँ वर्ष पुरानो सांस्कृतिक, सामाजिक तथा व्यापारिक सम्पर्कमा आधारित रहेको उल्लेख गरे । 

सन् १९४९ मा जनवादी क्रान्तिपछि सन् १९५५ मा दुई देशबीच औपचारिक कूटनीतिक सम्बन्ध स्थापना भएको र नेपाल एक चीन नीतिप्रति प्रतिबद्ध रहेको उनले बताए । उनले चिनिया राष्ट्रपति सी चिनफिङले अघि सारेको बीआरआई अवधारणाले ग्लोबल साउथलाई जोड्ने प्रयास गरेको उल्लेख गरे । 

उनले लोकार्पण गरिएको पुस्तकले नेपाली पाठक र युवा पुस्तालाई नेपाल–चीन सम्बन्ध, ताङ वंशको इतिहास र बौद्ध धर्म बुझ्न मद्दत पुर्‍याउने तथा दुई देशबीचको जनस्तरको सम्बन्ध थप प्रगाढ बनाउने विश्वास व्यक्त गरे ।