मस्को- रुसमा ४५० सदस्यीय तल्लो सदन ‘स्टेट डुमा’ चयनका लागि शुक्रबारदेखि तीनदिने मतदान सुरु भएको छ। सुदूरपूर्वी क्षेत्र कामचात्का र चुकोटका लगायतका क्षेत्रमा स्थानीय समयअनुसार बिहान ८ बजेदेखि मतदान सुरु भएको हो। मतदान सेप्टेम्बर २० सम्म चल्नेछ।

सन् २०२२ मा युक्रेनमाथि पूर्णस्तरीय सैन्य आक्रमण सुरु भएपछि रुसमा हुन लागेको यो पहिलो संसदीय निर्वाचन हो। निर्वाचनमा स्टेट डुमाका सबै ४५० सिटका लागि जनप्रतिनिधि चयन हुँदैछन्। आधिकारिक परिणाम सेप्टेम्बर २२ सम्म सार्वजनिक हुने अपेक्षा गरिएको छ।

राष्ट्रपति भ्लादिमिर पुटिनको नेतृत्वमा रहेको क्रेमलिनले निर्वाचनलाई युक्रेन युद्धप्रतिको जनसमर्थन मापन गर्ने अवसरका रूपमा प्रस्तुत गरेको छ। पुटिनले पनि मतदानमा सहभागी हुन आग्रह गर्दै निर्वाचनले रुसी जनताको एकता र आफ्ना सैनिकप्रतिको समर्थन देखाउने बताएका छन्।

निर्वाचनमा सत्तारूढ युनाइटेड रसिया पार्टीसँगै कम्युनिस्ट पार्टी, लिबरल डेमोक्रेटिक पार्टी (एलडीपीआर), अ जस्ट रसिया र न्यू पिपललगायत दल प्रतिस्पर्धामा छन्। युनाइटेड रसिया हाल स्टेट डुमाका ४५० मध्ये ३२१ सिटसहित सबैभन्दा ठूलो दल हो।

युद्धको विरोध गर्ने प्रमुख दल याब्लोकोलाई भने स्टेट डुमाको पार्टी–सूची निर्वाचनमा उम्मेदवार उठाउनबाट रोकिएको छ। यसका कारण निर्वाचनमा वास्तविक राजनीतिक प्रतिस्पर्धा सीमित भएको भन्दै आलोचना हुँदै आएको छ।

रुसले युक्रेनका आफूले नियन्त्रणमा लिएका केही क्षेत्रमा समेत मतदान केन्द्र सञ्चालन गरेको छ। युक्रेनले त्यहाँ हुने रुसी निर्वाचनलाई अस्वीकार गर्दै आएको छ।

यसैबीच, निर्वाचन सुरु हुनुअघि रुसका विभिन्न क्षेत्रमा युक्रेनी ड्रोन आक्रमणका घटना पनि भएका छन्। मस्कोका मेयर सेर्गेई सोब्यानिनका अनुसार सेप्टेम्बर १७ को साँझदेखि १८ सेप्टेम्बरको बिहानसम्म मस्कोतर्फ आएका सयौँ ड्रोन नष्ट वा निष्क्रिय पारिएका थिए।

पुटिन सन् १९९९ को अन्त्यदेखि रुसको सत्ताको केन्द्रमा छन् भने युनाइटेड रसियाले सन् २००० को दशकको सुरुदेखि रुसी राजनीतिमा प्रभुत्व कायम गर्दै आएको छ। युद्ध, आर्थिक दबाब र राजनीतिक असन्तुष्टिबीच भइरहेको यस निर्वाचनको मतपरिणामलाई क्रेमलिनले जनमतको महत्वपूर्ण संकेतका रूपमा हेर्ने अपेक्षा गरिएको छ।