काठमाडौं- बाढी प्रभावित परिवारको राहत तथा पुनःस्थापनामा सक्रिय आर्या फार्मा ल्याब प्रालिले नुवाकोटमा स्वास्थ्य शिविर सञ्चालन गर्ने भएको छ ।

कम्पनीले चितवन मेडिकल कलेजसँग सहकार्य गरी विदुर नगरपालिकाका बाढी प्रभावित नागरिकलाई लक्षित गर्दै सातदिने सामुदायिक स्वास्थ्य शिविर सञ्चालन गर्न लागेको हो ।

शिविर विदुर नगरपालिका–७ स्थित सलोचना स्कुल, वडा नम्बर ५ स्थित त्रिशूली विद्यालय र वडा नम्बर ९ स्थित भैरवडाँडामा सञ्चालन गरिनेछ ।

शिविरमा विशेषज्ञ चिकित्सकमार्फत स्वास्थ्य परीक्षण तथा परामर्श, आवश्यक औषधि वितरण र विभिन्न रोगको परीक्षण निःशुल्क गरिने आर्या फार्मा ल्याबले जनाएको छ । थप उपचार आवश्यक पर्ने बिरामीको पहिचान गरी सम्बन्धित स्वास्थ्य संस्थामा रेफर गर्ने व्यवस्था पनि मिलाइनेछ ।

बाढीपछि प्रभावित परिवारलाई स्वास्थ्य संस्थासम्म पुग्न आर्थिक तथा व्यावहारिक कठिनाइ भइरहेको अवस्थालाई ध्यानमा राख्दै समुदायमै पुगेर स्वास्थ्य सेवा दिन शिविर सञ्चालन गर्न लागिएको कम्पनीले जनाएको छ ।

आर्या फार्मा ल्याबले यसअघि प्रधानमन्त्री दैवी प्रकोप राहत कोषमा ८२ लाख रुपैयाँ बराबरका औषधिजन्य सामग्री सहयोग गरेको थियो । सोही अभियानलाई निरन्तरता दिँदै प्रभावित बस्तीमै पुगेर स्वास्थ्य सेवा उपलब्ध गराउन लागिएको कम्पनीको भनाइ छ ।

बाढी प्रभावित क्षेत्रमा स्वास्थ्य जोखिम बढ्न सक्ने अवस्थालाई मध्यनजर गर्दै निजी क्षेत्रको सामाजिक उत्तरदायित्वअन्तर्गत राहत तथा स्वास्थ्य सेवामार्फत सहयोगलाई निरन्तरता दिइरहेको आर्या फार्मा ल्याबले जनाएको छ ।