काठमाडौं- रसुवाको भोटेकोशीमा गत भदौ १० गते गएको बाढीमा परेर त्रिशूली थ्री ‘ए’ को सुरुङमा अड्किएको १० दिनपछि उद्धार गरिएका व्यक्तिहरूको सैनिक अस्पतालको आईसीयूबाट अन्तर्वार्ता लिइएकोबारे प्रेस काउन्सिल नेपालले ध्यानाकर्षण जनाएको छ ।

काउन्सिलले ‘इनसाइड द बंकर’ नामक युट्युब च्यानलबाट आईसीयूमा उपचाररत व्यक्तिसँग अन्तर्वार्ता लिई सम्प्रेषण गरिएको सामग्रीप्रति ध्यानाकर्षण भएको जनाएको हो । उक्त च्यानलका सञ्चालक सुरजसिंह ठकुरीले सेनाकै अनमुति लिएर आईसीयुै सन्तोष साह र कवीर महर्जनको अन्तर्वार्ता लिएका थिए ।

यसअघि सगरमाथामा सम्पर्कविहीन भएको सातौँ दिनमा भेटिएका एकजना पथप्रदर्शक अस्पतालको आईसीयूमा उपचाररत रहेका बेला अन्तर्वार्ता लिई बीबीसी नेपालीले प्रसारण गरेको भिडियो सामग्रीको विषय पनि काउन्सिलको जानकारीमा आएको विज्ञप्तिमा उल्लेख छ ।

काउन्सिलले दुवै सामग्रीका सम्बन्धमा पत्रकार आचारसंहिताको परिधिभित्र रहेर थप अध्ययन तथा अनुगमन गरिरहेको जनाएको छ ।

यस विषयमा अध्ययनका लागि सम्बन्धित सञ्चारकर्मी, अस्पताल र मेडिकल काउन्सिलमा पत्राचारसमेत गरिएको प्रेस काउन्सिल नेपालले सोमबार भनेको छ।