एजेन्सी- यमनमा इरानसमर्थित हुथी विद्रोही र साउदी अरबबीचको द्वन्द्व चर्किएको छ। हुथी विद्रोहीले बुधबार साउदी सेनाले यमनका विभिन्न क्षेत्रमा ३२ वटा हवाई आक्रमण गरेको दाबी गरेका छन्।

हुथीको अलमसिराह टेलिभिजनका अनुसार साउदी विमानले मारिब, अल–जौफ, ताइज र होदेइडाका विभिन्न क्षेत्रमा आक्रमण गरेका हुन्। एक दिनअघि हुथीहरूले साउदी अरबमा ठूलो आक्रमण गरेपछि साउदी पक्षले जवाफी कारबाही गरेको हुथीहरूको दाबी छ। उक्त दाबीबारे साउदी पक्षबाट तत्काल आधिकारिक प्रतिक्रिया आएको छैन।

साउदी अधिकारीहरूले भने हुथी आक्रमणका कारण मंगलबार केही तेल प्रतिष्ठानको काम अस्थायी रूपमा बन्द भएको र ७३ जना घाइते भएको बताएका छन्।

गत सातादेखि यमनमा पुनः भीषण लडाइँ भइरहेको छ। हुथीहरूले बाब अल–मन्दब जलघाँटी आसपासका क्षेत्रमा ठूलो सैन्य अभियान थालेपछि द्वन्द्व चर्किएको बताइएको छ। पछिल्लो लडाइँमा पाँच सयभन्दा बढी मानिसको मृत्यु भएको एएफपीले दुवै पक्षका स्रोतलाई उद्धृत गर्दै जनाएको छ।

बाब अल–मन्दब जलघाँटी साउदी तेल निर्यात तथा अन्तर्राष्ट्रिय समुद्री व्यापारका लागि महत्वपूर्ण मार्ग हो। हर्मुज जलघाँटीमा उत्पन्न अवरोधपछि यसको रणनीतिक महत्व थप बढेको छ।

हुथीहरूले जुलाईदेखि साउदी तेल पूर्वाधार र तेल ट्याङ्करमाथि पटकपटक आक्रमण गर्दै आएका छन्। उनीहरूले साउदीविरुद्ध समुद्री नाकाबन्दी घोषणा गर्दै जहाजमाथि समेत आक्रमण थालेका छन्।

पछिल्लो घटनाक्रमले यमनको द्वन्द्वलाई थप तीव्र बनाउनुका साथै लाल सागर र बाब अल–मन्दब हुँदै हुने तेल तथा समुद्री व्यापारमा सुरक्षा जोखिम बढाएको छ।