काठमाडौं–  जेन-जी आन्दोलनका घाइते अनिश सापकोटा अहिले उपचारका क्रममा छन् । 

उनको देब्रेपट्टि आँखा भन्दा तलको जोर्नी पुरै फ्याक्चर भएर सामान्य तरिकाले मात्रै सिलाएर राखिएको छ  । उनको  अप्रेशन गर्न आफू भौँतारिरहेको उनकी आमा अम्बिका सापकोटाले बताइन् । 

‘भित्र दाँत मोल्न पनि भइराखेको छैन । क्यान्सर हुन्छ कि भन्ने डर भइसकेछ । अहिले अब अप्रेशन गर्दा धेरै खर्च लाग्छ । अलिकति आँखाको जोर्नी तल झरिसकेको छ ।’ उनले भनिन्, ‘उसको बाबा, मेरो कान्छो छोरा सत्र दिनको हुँदा छोडेर जानुभयो । तीन छोराहरुको नागरिकताहरू केही छैन । यिनीहरूको पाउनु पर्ने अधिकारहरू अहिले अब भत्तै आउँथ्यो होला घाइतेको, त्यो पनि छैन । लाइसेन्स छैन ।’

जेन-जी आन्दोलनका क्रममा घाइते भएका १८ वर्षीय छोराको उपचारका लागि सरकारले सहयोग गर्नुपर्ने भन्दै उनले आग्रह गरेकी छन् ।

उनले राहत तथा उपचार खर्चका लागि वडा कार्यालयसहित विभिन्न निकायबाट आवश्यक सिफारिस र मुचुल्का तयार पारेर पटक पटक धाएको बताइन् । 

घाइते छोराको उपचारमा यसअघि १३ देखि १५ लाख रुपैयाँसम्म खर्च भएको र अब हड्डी जोड्न तीन वटा शल्यक्रिया गर्नुपर्ने चिकित्सकले बताएको उनको भनाइ छ ।

उनका अनुसार घाइते छोरा कक्षा १२ उत्तीर्ण गरेपछि काम गर्न थालेका थिए । तर शरीरमा लागेको चोटका कारण भारी उठाउन नसक्ने र काम गर्न नसक्ने अवस्थामा पुगेपछि अहिले घरमै राखिएको छ ।

‘जेन-जी आन्दोलनमा रगत बग्यो, परिवर्तन त भयो तर जेन-जी घाइतेहरूका लागि केही भएन,’ उनले भनिन्, ‘सरकारले उपचार खर्च वा रोजगारीको व्यवस्था गरिदिनुपर्छ।’