काठमाडौं– धादिङको बेनीघाट रोराङ गाउँ पालिका ७ पृथ्वी राजमार्गको कृष्णभिरमा भासिएको सडक पूर्ण रुपमा निर्माण हुन अझै केही समय लाग्ने भएको छ ।
त्रिशूली नदीमा आएको बाढीको कटानका कारण भाद्र १४ गते सडक भासिए पनि कृष्णभीरमा सडक अवरुद्ध भएको छ । उक्त स्थानको साइडबाट भित्ता काटेर सडक निर्माण गर्ने काम भई रहेको छ ।
काठमाडौं आउने मुख्य राजमार्ग अवरुद्ध भएपछि यात्रुवाहक यातायातका साथै अत्यावश्यक सामाग्रीको ढुवानी प्रभावित भएको छ ।
उक्त सडकखण्ड छिटो निर्माणको लागि सम्पूर्ण प्राविधिकहरू लागि परेको सडक विभागका महानिर्देशक विजय जैसीले बताए।
उनले जोखिम मोलेरै भए पनि भूगर्भविद् तथा इन्जिनियरहरूको परामर्शमा सडक खुलाउने काम भइरहेको जानकारी दिए ।
बाढी आउने सम्भावना अझै एक महिना रहने भएकाले पानी पसेर थप क्षति नहोस् भनेर सतर्कता अपनाइएको उनको भनाइ छ ।
महानिर्देशक जैसीले भविष्यमा यस समस्याको स्थायी समाधानका लागि सुरुङ मार्ग बनाउने वा पारिपट्टि पुल हालेर सडक लैजाने दुई वटा विकल्पमा प्राविधिक तथा लागत अध्ययन भइरहेको जानकारी दिए ।
उक्त राजमार्गको करिब २ सय मिटर सडक त्रिशूली नदीले कटान गर्दा भासिएको थियो । उक्त सडक खण्डमा भित्ता काटेर सडक बनाउने काम भइरहेको छ ।
उक्त सडक निर्माणको लागि दुवै तर्फ वाट ५ वटा मेसिन सञ्चालनमा रहेका छन् । उक्त सडक अवरुद्ध हुँदा काठमाडौंबाट अन्य जिल्ला जाने र अन्य जिल्लाबाट काठमाडौं आउने सवारी साधनहरूले वैकल्पिक राजमार्गहरू प्रयोग गर्दै आएका छन् ।
प्रतिक्रिया