काठमाडाैँ – उत्तरी गोरखाको चुमनुब्री गाउँपालिका–४ स्थित नाम्रुङ खोलामा आएको बाढीले चारवटा घरमा क्षति पुर्‍याउनुका साथै आवतजावत गर्ने फलामे पुल बगाएको छ।

प्रहरीका अनुसार बाढीले स्थानीय नगु छिरिङ र वर्गीन लामाको कच्ची घर पूर्ण रूपमा बगाएको छ। यस्तै लाक्पाभुटी लामा र दोर्जे घ्याल्जेनको कच्ची घरमा बाढीले क्षति पुर्‍याएको जिल्ला प्रहरी कार्यालयले जनाएको छ।

बाढीले नार्बु हुँदै ल्हो जोड्ने मुख्य फलामे पुलसमेत बगाएपछि त्यस क्षेत्रको पदमार्ग तथा आउजाउ अवरुद्ध बनेको छ। घटनामा हालसम्म कुनै मानवीय क्षति भने भएको छैन।

घटनास्थलमा उद्धार तथा क्षतिको थप विवरण संकलनका लागि इलाका प्रहरी कार्यालय लार्केबाट प्रहरी टोली खटिएको छ।