काठमाडौं– औषधि व्यवस्था विभागले क्युरेक्स फर्मास्युटिकल्स प्रालि, बनेपाद्वारा उत्पादित ‘प्यान्टोलोक–डीएसआर’ नामक औषधिको एक ब्याच न्यून गुणस्तरको पाइएकाले बजारबाट तुरुन्त फिर्ता गर्न निर्देशन दिएको छ । 

विभागले औषधि ऐन, २०३५ को दफा १४ बमोजिम उक्त औषधिको बिक्री वितरण रोक्का गरी बजारबाट फिर्ता गर्न उत्पादक उद्योग तथा यसका प्रतिनिधिहरूलाई निर्देशन दिएको हो । विभागद्वारा जारी गरिएको सूचना अनुसार बजार अनुगमनका क्रममा संकलन गरिएको औषधिको नमूनालाई राष्ट्रिय औषधि प्रयोगशालामा परीक्षण गर्दा उक्त ब्याचको औषधि न्यून गुणस्तरको पाइएको हो । 

विभागले ‘प्यान्टोलोक–डीएसआर’ नामको ब्याच नम्बर सिपिडी–०५७ रहेको र उत्पादन मिति सेप्टेम्बर २०२५ देखि म्याद सकिने मिति अगस्ट २०२७ रहेको औषधि फिर्ता गर्न निर्देशन दिएको हो । 

विभागका अनुसार उक्त ब्याचको औषधिको परीक्षण गर्दा ‘डम्पिरिडोन’को डिजोलुसन टेस्ट निर्धारित मापदण्ड अनुसार नपाइएकाले फिर्ता गर्न भनिएको हो ।