जनकपुर – रसुवाको भोटेकोशी नदीमा आएको भीषण बाढीपछि सम्पर्कविहीन भएकामध्ये मधेश प्रदेशका ३० जना परिवारको सम्पर्कमा आएका छन्। मधेश प्रदेश प्रहरी कार्यालयका अनुसार बाढीमा परेर हराइरहेका १९२ जनामध्ये ३० जना टेलिफोनमार्फत सम्पर्कमा आएका हुन् भने १६२ जना अझै सम्पर्कविहीन छन्।

प्रदेश प्रहरी कार्यालय जनकपुरका प्रवक्ता वरिष्ठ प्रहरी उपरीक्षक (एसएसपी) प्रभुप्रसाद ढकालका अनुसार विभिन्न जिल्लाबाट सिन्धुली, पर्सा, बारा, रौतहट, सर्लाही, महोत्तरी, धनुषा, सिरहा र सप्तरीका केही नागरिक आफन्तको सम्पर्कमा आएका हुन्।

सम्पर्कमा आउनेहरूमा वीरगञ्जमा बस्दै आएका सिन्धुलीका ज्ञानबहादुर थिङ र श्याम मोक्तान, बाराका सत्यम राम र रुपेश गुप्ता तथा रौतहटका मोविदा खातुन, सकिना खातुन, सलमान अन्सारी, सेख मजिद, पवित्रा नेपाल सिलवाल र सम्राट सिलवाल छन्। यस्तै सर्लाहीका वृजकिशोर दास, सुनिता दास र दिपेश थापा; महोत्तरीका राकेशकुमार यादव, विपीनकुमार मण्डल, श्रीकेश यादव, युवराज पाण्डे, सचिनकुमार यादव, आदित्यनारायण यादव र विकास भारती पनि सम्पर्कमा आएका छन्।

धनुषाका लक्ष्मण मेहता, दयावतीदेवी यादव, विजयकुमार यादव, सुरेश पजियार, रीतिक झा, विक्रम ठाकुर र सुशान्त यादव तथा सिरहाका टार्जन बलम्पाकी, उमेश यादव र अजय मरिक पनि सम्पर्कमा आएको प्रहरीले जनाएको छ।

अझै पनि ठूलो संख्यामा नागरिक बेपत्ता रहेका छन्। प्रहरीका अनुसार सप्तरीका ४८, पर्साका ३८, बाराका २३, सर्लाहीका १८, रौतहटका १३, सिरहाका १२, महोत्तरीका १० र धनुषाका ७ जना अझै सम्पर्कविहीन छन्। मधेशका विभिन्न जिल्लाबाट आफन्त हराएको सूचना आउने क्रम जारी रहेकाले प्रहरीले खोजी तथा विवरण संकलन कार्यलाई तीव्रता दिएको एसएसपी ढकालले बताए।