काठमाडौं– केन्द्रीय बैंकको पछिल्लो तथ्यांकअनुसार बङ्गलादेशको वैदेशिक व्यापार घाटा आर्थिक वर्षमा तीन वर्षकै उच्च बिन्दुमा पुगेको छ। निर्यात आम्दानीमा कुनै खास वृद्धि नभई आयात खर्च निरन्तर बढेका कारण व्यापार घाटामा ठूलो उछाल आएको पाइएको छ। 

केन्द्रीय बैंकको प्रतिवेदन अनुसार समीक्षाधीन आर्थिक वर्षमा देशको कुल व्यापार घाटा २७ अर्ब ३० करोड अमेरिकी डलरभन्दा बढी पुगेको छ, जुन अघिल्लो आर्थिक वर्षको तुलनामा करिब ३४ प्रतिशतले बढी हो। यस अवधिमा बंगलादेशको कुल वस्तु निर्यात करिब ४३ अर्ब ८५ करोड डलरमा सीमित रहेको छ, जुन अघिल्लो वर्षको तुलनामा लगभग स्थिर जस्तै छ। 

अर्कोतर्फ, देशको कुल आयात खर्च १०.५ प्रतिशतले बढेर ७१ अर्ब १४ करोड डलर पुगेको छ। अर्थशास्त्री तथा विश्लेषकहरूले यस किसिमको व्यापार असन्तुलनले मुलुकको बाह्य क्षेत्रको अर्थतन्त्रमा केही दबाब सिर्जना गरे तापनि उच्च रेमिट्यान्स आप्रवाहका कारण तत्कालै गहिरो भुक्तानी सन्तुलनको संकट भने नआएको स्पष्ट पारेका छन्। यद्यपि, लगानीमुखी आयात र उत्पादनमूलक क्षेत्रमा अपेक्षित सुधार आउन नसक्नु चिन्ताको विषय बनेको उनीहरूको ठम्याइ छ।