काठमाडौं- नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले नेपालमा विगतमा भएका विभिन्न गम्भीर प्राकृतिक विपद्का घटनाको स्मरण गर्दै त्यसबाट पाठ सिक्नुपर्ने बताएका छन्।

प्रतिनिधिसभाको बैठकमा बोल्दै प्रचण्डले राष्ट्रिय स्वतन्त्र पार्टीका सांसदहरू नयाँ रहेको सन्दर्भ उल्लेख गर्दै आफूले विगतमा देशमा घटेका विभिन्न गम्भीर घटनाको समीक्षा गर्न लागेको बताए।

उनले पछिल्लो समय भोटेकोशी क्षेत्रमा आएको विपद्लाई नेपालको इतिहासकै भयावह घटनामध्ये एकका रूपमा उल्लेख गर्दै ठूलो मानवीय तथा भौतिक क्षति भएको बताए।

‘नेपालको इतिहासमै सायद यति भयानक प्रलय हाम्रो पुस्ताले देखेको थिएन। भोटेकोशीमा आएको त्यो प्रलयबाट हजारौँको जीवन र खर्बौँको क्षति भएको छ,’ प्रचण्डले भने, ‘यहाँहरू सबै नयाँ हुनुहुन्छ। म यसअगाडि देशमा घटेका विभिन्न गम्भीर घटनाहरूको विषयमा समीक्षा गर्छु। यसबाट हामीले पाठ सिक्न जरुरी छ।’

प्रचण्डले २०७२ सालको विनाशकारी भूकम्प, त्यसपछिका विभिन्न भूकम्प तथा देशका विभिन्न क्षेत्रमा भएका बाढीपहिरोलगायतका घटनाको समेत चर्चा गरेका छन्।

उनले विगतमा भएका विपद्का घटनाको अनुभव र त्यसबाट प्राप्त शिक्षालाई आगामी दिनको विपद् व्यवस्थापनमा उपयोग गर्नुपर्नेमा जोड दिए।