काठमाडौं– नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्डले विपत्तिको सामना गर्न केन्द्र, प्रदेश र स्थानीय तहका सबै सरकार पूर्ण रूपमा परिचालित हुन नसकेको बताएका छन् ।

प्रतिनिधिसभाको बैठकमा बोल्दै प्रचण्डले विपत्तिको समयमा सरकारलाई साथ दिन आफूहरूको कुनै विमति नरहेको बताए । सेना परिचालन भए पनि जनप्रतिनिधि र जनपरिचालन प्रभावकारी रूपमा जोडिन नसकेको उनको भनाइ छ ।

‘सेना परिचालनसँगै जनपरिचालन जोडिएन भने काम हुँदैन । सरकार उद्धार कार्यमा सफल होइन, असफल भयो भन्ने जनगुनासो सबैभन्दा बढी सुनिएको छ,’ प्रचण्डले भने ।

उनले सरकारले आफ्नो कामप्रति घमण्ड गर्नुभन्दा कमजोरीबाट शिक्षा लिनुपर्ने बताए । सुरुङभित्र फसेकाहरूको खोज तथा उद्धारमा पनि सरकारले तत्काल पहल नगरेको भन्दै उनले आलोचना गरे ।

जनस्तरबाट आएका विज्ञको सहयोगसमेत पर्याप्त रूपमा लिन नसकेको गुनासो रहेको उनले संसद्मा जानकारी गराए।

प्रचण्डले बाढी प्रभावित क्षेत्रको तत्काल उद्धार, राहत र पुनर्स्थापनासँगै दीर्घकालीन पुनर्निर्माणमा समेत गम्भीर भएर अघि बढ्नुपर्ने बताए । 

उनले विपद् व्यवस्थापनका लागि अन्तर्राष्ट्रिय विज्ञको सहयोग लिनुपर्ने भन्दै जापान र स्वीट्जरल्यान्डको उदाहरणबाट सिक्न सकिने धारणा राखे ।