काठमाडौं– भोटेकोशी–त्रिशूली बाढीपछि प्रभावित हाइड्रोपावर आयोजनाका टनेलमा खोज तथा उद्धार कार्य तीव्र पारिएको छ। रसुवागढी हाइड्रोको टनेलमा उद्धार टोली करिब १५० मिटरभित्र पुगे पनि ठूला चट्टानका कारण थप अघि बढ्न सकेको छैन।

त्रिशूली–३ ‘ए’ आयोजनामा संयुक्त ९३ सदस्यीय टोलीले माटो तथा ढुंगा हटाउँदै टनेलको आउटलेट फेला पारेको छ। वर्षाका कारण जमेको करिब डेढ मिटर पानी पम्पबाट निकाल्ने काम भइरहेको छ।

लाङटाङ, चिलिमे र अपर त्रिशूली–१ हाइड्रोमा पनि खोजी जारी छ। त्रिशूली–३ ‘बी’ आयोजनामा कार्यालय तथा आवास क्षेत्रसम्म पुग्न एक्स्काभेटरबाट बाटो निर्माण भइरहेको छ।

यसैबीच, रसुवाको टिमुरेदेखि नुवाकोट, धादिङ, चितवन र नवलपरासी पूर्वसम्म ९ हजार २ सयभन्दा बढी नेपाली सेना परिचालन गरी खोज तथा उद्धार, शव व्यवस्थापन, सडक खुलाउने र आपत्कालीन उपचारलगायतका काम भइरहेको नेपाली सेनाले जनाएको छ।