काठमाडौं– निजी सवारी साधन अर्को प्रयोजनको निम्ति प्रयोग गर्ने नपाइने भएको छ ।

भौतिक तथा यातायत मन्त्रालय यातायात व्यवस्था विभागले एक सूचना जारि गदै कुनै एक प्रयोजनको निम्ति दर्ता भएको सवारी अर्को प्रयोजनमा प्रयोग गर्ने नपाइने जानकारी दिएको छ ।

पछिल्लो समय निजी सवारी साधनले भाडा लिई यात्रु ओसारसार गरेको गुनासो बढे पछि विभागले निजी सवारी साधनले भाडालिई यात्रु ओसारपसार गरेको खण्डमा सवारी तथा यातायात व्यवस्था ऐन २०४९ बमोजिन कारवाही गर्ने चेतावनी दिएको छ ।

यो सूचना कार्यान्वयन भएमा निजी सवारीबाट भाडा लिइ यात्रु बोकिरहेका टुटल, पठाओलगायतका मोटरसाइकलमा यात्रु बोक्ने सेवा प्रभावित हुनेछन् ।

यसअघि पनि टुटल र पठाओले मानिसहरु बोकेको भन्दै कारवाही गरिएको थियो । तर चौतर्फी विरोध भएपछि प्रधानमन्त्री केपी ओलीले कारवाही नगर्न भनेका थिए ।

तर ट्याक्सी व्यवसायी र यातायात व्यवसायीले भने यसको विरोध गर्दै आएका थिए ।