मुस्ताङ- रसुवाको भोटेकोशी बाढी प्रभावित क्षेत्रमा उद्धार तथा राहतका लागि मुस्ताङको घरपझोङ गाउँपालिका–३, जोमसोमस्थित पुथाङ गाउँसमाज (एयरपोर्ट)ले पाँच लाख ५१ हजार रुपैयाँ सहयोग गर्ने निर्णय गरेको छ।

गाउँसमाजको मौज्दात कोषबाट उक्त रकम सहयोग गर्ने निर्णय गरिएको हो। समाजका गाउँमुखिया अनिल शेरचनको अध्यक्षतामा आज बिहान बसेको १५औँ समितिको बैठकले बाढीपीडितका लागि रकम उपलब्ध गराउने निर्णय गरेको समितिका सचिव पेमा छेतेन विकले जानकारी दिए।

उनका अनुसार सहयोग रकम तत्काल प्रधानमन्त्री दैवी प्रकोप उद्धार कोषमा जम्मा गरिनेछ।

गाउँमुखिया शेरचनले भोटेकोशी बाढीका कारण ठूलो जनधनको क्षति हुनुका साथै सयौँ नागरिक सम्पर्कविहीन भएको खबरले समाजलाई दुःखी बनाएको बताए। बाढीका कारण राष्ट्रिय सङ्कट उत्पन्न भएको उल्लेख गर्दै उनले विपद्को यस घडीमा सबै नेपाली एकताबद्ध भएर उद्धार तथा राहत कार्यमा सहयोग गर्न आह्वान गरे।