काठमाडौं– बाढी तथा प्राकृतिक विपद्का कारण प्रभावित नागरिकको उद्धार, राहत तथा स्वास्थ्य उपचारमा सहयोग पुर्‍याउने उद्देश्यले आर्य फार्मेसीले नेपाल सरकारलाई आवश्यक औषधि तथा स्वास्थ्य सामग्री सहयोग गरेको छ।

फार्मेसीले बाढी तथा विपद् प्रभावित क्षेत्रमा रहेका स्वास्थ्य चौकी तथा स्वास्थ्य स्वयंसेवकका लागि आवश्यक स्वास्थ्य उपचारसम्बन्धी ५ लाखभन्दा बढी मूल्य बराबरका औषधि उपलब्ध गराएको जनाएको छ।

प्रभावित नागरिकको स्वास्थ्य उपचारमा थप सहयोग आवश्यक रहेको अवस्थामा कम्पनीले उपचारका लागि आवश्यक उपकरण तथा औषधिहरू सहयोगस्वरूप उपलब्ध गराउने प्रतिबद्धता समेत व्यक्त गरेको छ।

विपद्को समयमा प्रभावित नागरिकलाई आवश्यक औषधि तथा स्वास्थ्य सेवामा सहज पहुँच सुनिश्चित गर्न गरिएको उक्त सहयोगले स्वास्थ्य चौकी तथा स्वास्थ्य स्वयंसेवकमार्फत प्रभावित समुदायलाई महत्वपूर्ण राहत पुग्ने विश्वास फार्मेसीले व्यक्त गरेको छ।

बाढी तथा प्राकृतिक विपद्का कारण प्रभावित नागरिक तथा परिवारहरूको स्वास्थ्य सुरक्षालाई प्राथमिकतामा राख्दै गरिएको यस सहयोगमार्फत राहत तथा पुनःस्थापनाका कार्यमा समेत सकारात्मक योगदान पुग्ने अपेक्षा गरिएको छ।

आर्य फार्मेसीले विपद्को कठिन घडीमा प्रभावित नागरिक तथा परिवारहरूप्रति ऐक्यबद्धता जनाउँदै स्वास्थ्य सुरक्षाका लागि आवश्यक सहयोगमा निरन्तर साथ दिने प्रतिबद्धता व्यक्त गरेको छ।