काठमाडौं – रसुवास्थित भोटेकोसी नदीमा पुनः बाढी बढेपछि त्रिशूली नदीको तटीय क्षेत्रका बासिन्दालाई उच्च सतर्कता अपनाउन आग्रह गरिएको छ ।

जल तथा मौसम विज्ञान विभागअन्तर्गतको बाढी पूर्वानुमान महाशाखाले शुक्रबार राति ८ः५४ बजे सूचना जारी गर्दै भोटेकोसीदेखि मुग्लिनसम्मका नदी तटीय क्षेत्रका बासिन्दालाई अर्को सूचना नआएसम्म सुरक्षित स्थानमा रहन आग्रह गरेको हो ।

महाशाखाका अनुसार जिल्ला प्रहरी कार्यालय रसुवामा चीनतर्फबाट प्राप्त सूचनाका आधारमा भोटेकोसीमा पुनः बाढी बढेको हो । बाढीको जोखिमलाई मध्यनजर गर्दै त्रिशूली नदीको तटीय क्षेत्रका बासिन्दालाई उच्च सतर्कतासहित सुरक्षित स्थानमा रहन अनुरोध गरिएको छ ।

यसैबीच मौसम पूर्वानुमान महाशाखाले बाढीबाट प्रभावित रसुवा, धादिङ र नुवाकोटमा आगामी तीन दिन वर्षाको सम्भावना रहेको जनाएको छ ।

महाशाखाले शुक्रबार साँझ जारी गरेको मौसम बुलेटिनअनुसार शुक्रबार राति रसुवाका केही स्थानमा मध्यम वर्षा तथा एक-दुई स्थानमा भारी वर्षाको सम्भावना छ । धादिङ र नुवाकोटका धेरै स्थानमा मध्यम वर्षा तथा एक-दुई स्थानमा भारी वर्षाको सम्भावना रहेको छ ।

शनिबार दिउँसो पनि तीनवटै जिल्लाका धेरै स्थानमा मध्यम वर्षा तथा एक–दुई स्थानमा भारी वर्षा हुनसक्ने पूर्वानुमान गरिएको छ । शनिबार राति पनि रसुवा, धादिङ र नुवाकोटका धेरै स्थानमा मध्यम वर्षा तथा एक–दुई स्थानमा भारी वर्षाको सम्भावना रहेको महाशाखाले जनाएको छ ।

आइतबार दिउँसो रसुवा, धादिङ र नुवाकोटका धेरै स्थानमा मध्यम वर्षा तथा एक–दुई स्थानमा भारी वर्षाको सम्भावना रहेको छ । आइतबार राति भने रसुवा र धादिङका केही स्थानमा तथा नुवाकोटका धेरै स्थानमा मध्यम वर्षा हुनसक्ने महाशाखाको पूर्वानुमान छ ।

भोटेकोसीमा पुनः बाढी बढेको र आगामी दिनमा समेत प्रभावित क्षेत्रमा वर्षाको सम्भावना रहेकाले नदी तटीय तथा जोखिमयुक्त क्षेत्रमा रहेका नागरिकलाई थप सतर्कता अपनाउन आग्रह गरिएको छ ।