काठमाडौं– मुग्लिन–नारायणगढ सडकखण्डअन्तर्गत पृथ्वी राजमार्ग तीन दिनदेखि अवरुद्ध रहेको छ।

रसुवाको भोटेकोशी नदीमा आएको बाढीका कारण धादिङका विभिन्न स्थानमा लेदो थुप्रिएपछि बुधबार साँझदेखि सडक बन्द भएको हो।

गजुरी गाउँपालिका–५ को गलौदी र बाहुनी भिर तथा गल्छी गाउँपालिकाको महेश दोभानमा लेदो हटाउन बाँकी छ। सडकमा थुप्रिएको लेदो हटाउन उपकरण प्रयोग भइरहेको ट्राफिक प्रहरीले जनाएको छ।

बस्ती क्षेत्रमा लेदो थुप्रिएकाले उठाएर अन्यत्र व्यवस्थापन गर्नुपर्ने हुँदा सडक खुलाउन समय लागेको हो। बाहुनी भीरमा भने लेदो हटाउन आवश्यक उपकरण अझै पुग्न सकेको छैन।

पहिला गलौदी र महेश दोभानको लेदो हटाएपछि बाहुनी भीरमा काम गरिने प्रहरीले जनाएको छ। प्रहरीका अनुसार आज दिनभरमै सडक सञ्चालनमा ल्याउने गरी काम भइरहेको छ।