काठमाडौं–  पूर्वप्रधानमन्त्री सुशीला कार्कीले रसुवाको भोटेकोशी हुँदै त्रिशूली नदीमा आएको भीषण बाढीबाट प्रभावित परिवारलाई सहयोग गर्न स्वदेश तथा विदेशमा रहेका नेपालीलाई अपिल गरेकी छन् ।

भदौ १० गते बुधबार आएको बाढीका कारण रसुवा, नुवाकोट, धादिङ, गोरखा र चितवनलगायत जिल्लामा ठूलो जनधनको क्षति भएको भन्दै कार्कीले दुःख व्यक्त गरेकी हुन् ।

उनले आफ्नो एक महिनाको पेन्सन रकम बाढी पीडितको उद्धार र राहतका लागिसमेत दिएकी छन् । 

पूर्व प्रधानन्याधीश समेत रहेको कार्कीले प्रधानमन्त्री दैवी प्रकोप उद्धार कोषमा जम्मा हुने गरी राष्ट्रिय वाणिज्य बैंकको खातामा मासिक पेन्सनवापतको रकम ७७ हजार रुपैयाँ जम्मा गरेकी हुन् ।

उनले बाढीमा परी ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारजनमा समवेदना व्यक्त गरेकी छन् । 

साथै सम्पर्कविहीन व्यक्तिको खोजी तथा सकुशल उद्धारमा सफलता मिलोस् भन्दै घाइते तथा प्रभावितको शीघ्र स्वास्थ्यलाभ र सुरक्षित जीवनको कामना गरेकी छन्।