काठमाडौं– रसुवाको भोटेकोसी नदीमा आएको विनाशकारी बाढीपछि विभिन्न जिल्लामा फेला परेका शवको संख्या बढ्दै गएको छ ।
पछिल्लो विवरणअनुसार बाढीमा परी ज्यान गुमाउनेको संख्या २८९ पुगेको छ ।
बाढीपछि बेपत्ता भएकाहरूको खोजी गर्ने क्रममा नदी किनारका विभिन्न क्षेत्रमा थप शव फेला परिरहेका छन्।
जिल्ला प्रहरी कार्यालय पूर्वी नवलपरासीका अनुसार पछिल्लो समय त्यहाँ मात्रै ८१ जनाको शव फेला परेको छ ।
तीमध्ये ५५ जनाको शव जिल्लाका सातवटा अस्पतालमा राखिएको छ भने बाँकी २६ शव घटनास्थलमै रहेको र अस्पताल ल्याउने तयारी भइरहेको प्रहरीले जनाएको छ ।
पूर्वी नवलपरासीमा फेला परेका शवमध्ये २२ महिला, ३३ पुरुष, ६ बालक र ९ बालिका छन् । त्यस्तै ११ शवको अवस्था पहिचान खुल्न नसक्ने रहेको प्रहरीले जनाएको छ ।
यसअघि चितवनमा १०८, पश्चिम नवलपरासीमा १५, धादिङमा २७, गोरखामा २०, नुवाकोटमा १२, तनहुँमा ९ र रसुवामा १७ जनाको शव फेला परेको थियो ।
बाढीले ठूलो जनधनको क्षति पुर्याएपछि नदी तथा आसपासका क्षेत्रमा अझै धेरै व्यक्ति बेपत्ता रहेको आशंका गरिएको छ ।
प्रहरीले सुरक्षा निकायको टोली परिचालन गरी नदी किनार र सम्भावित क्षेत्रमा बेपत्ताको खोजीलाई निरन्तरता दिएको जनाएको छ ।
साथै फेला परेका शवको पहिचान तथा आफन्तलाई बुझाउने प्रक्रिया पनि अघि बढाइएको छ ।
प्रतिक्रिया