काठमाडौं- एक सातापछि विद्युत् उत्पादन सुरू गरेर राष्ट्रिय प्रसारण लाइनमा जोड्ने तयारीमा रहेको रसुवास्थित निर्माणाधीन लाङटाङ खोला जलविद्युत् आयोजना ध्वस्त भएको छ। भोटेकोसीमा आएको भीषण बाढीले यो आयोजना नै तहसनहस बनाएको हो ।

आयोजनाको पावर हाउस बाढीले पूर्ण रूपमा बगाएको छ भने सुरुङभित्र काम गरिरहेका करिब ६० जना कर्मचारी तथा मजदुर सम्पर्कविहीन छन् । बुधबार बिहान चीनको तिब्बततर्फबाट भोटेकोसीमा आएको बाढीका कारण आयोजना क्षेत्रमा ठूलो क्षति पुगेको हो ।

निर्माण कम्पनी मल्टी इनर्जी प्रालिका प्रबन्ध निर्देशक विजयमोहन भट्टराईका अनुसार बाढी आउँदा कर्मचारी र मजदुर सुरुङभित्र कंक्रिट ढलानको काममा व्यस्त थिए ।

आयोजनामा मल्टी इनर्जीका इन्जिनियर, ओभरसियर, गार्ड र भान्छेसहित २५ जना तथा पेटी कन्ट्र्याक्टरतर्फका करिब ३५ जना मजदुर कार्यरत थिए । उनीहरू बिहानदेखि सम्पर्कमा नरहेको भट्टराईले बताए ।

‘अर्को साता बत्ती बाल्ने तयारी थियो। तीन दिनअघि मात्रै फिल्डमा गएर आएको थिएँ,’ भट्टराईले भने, ‘आयोजना त फेरि बनाउँला, तर हाम्रा काबिल इन्जिनियर र मजदुरहरूको अवस्था अज्ञात हुँदा मन बेचैन भएको छ ।’

बाढीले आयोजनाको पावर हाउसको संरचना नै नरहने गरी क्षति पुर्‍याएको उनले बताए । बाढी प्राकृतिक जलसतहभन्दा करिब १ सय २५ मिटर माथिसम्म पुगेको थियो ।

स्वतन्त्र ऊर्जा उत्पादकहरूको संस्था नेपाल (इप्पान) का सचिवसमेत रहेका भट्टराईले घटनालाई सामान्य बाढी नभई ‘महाप्रलय’ को संज्ञा दिएका छन् । उनले अहिले आयोजनाको क्षतिभन्दा पनि सम्पर्कविहीन कर्मचारी तथा मजदुरको खोजीलाई प्राथमिकता दिनुपर्ने बताए ।

उनले भने, ‘प्रोजेक्ट त फेरि बनाऔँला, तर मान्छे कहाँबाट ल्याउने ?’ उनले मानवीय क्षति नै सबैभन्दा ठूलो चिन्ताको विषय भएको बताए ।