काठमाडौं– तिब्बतबाट आएको भीषण बाढीले रसुवा हुँदै नेपालका विभिन्न क्षेत्रमा ठूलो क्षति पुर्‍याएपछि उद्धार कार्यलाई तीव्र बनाउने तयारी गरिएको छ । 

बाढीका कारण सडक, पुल, विद्युत् तथा अन्य भौतिक संरचनामा क्षति पुगेको छ भने केही स्थानमा मानिसहरू सम्पर्कविहीन भएका छन् । सम्पर्कविहीन व्यक्तिको यकिन संख्या भने अझै स्पष्ट हुन सकेको छैन ।

यस्तो विपद्को अवस्थामा उद्धार कार्यमा ढिलाइ नहोस् भन्दै सरकारले महत्त्वपूर्ण निर्णय गरेको छ । बाढीपीडितको उद्धारका लागि निजी क्षेत्रका हेलिकप्टरले छुट्टै अनुमति लिन नपर्ने भएको छ ।

प्रधानमन्त्री कार्यालयबाट निजी हेलिकप्टरलाई आवश्यकताअनुसार तत्काल उद्धार उडान गर्न सहजीकरण गर्ने निर्देशन दिइएको छ।

यस निर्णयसँगै दुर्गम तथा बाढीका कारण सडक सम्पर्क टुटेका क्षेत्रमा फसेका नागरिकको उद्धार छिटो हुने अपेक्षा गरिएको छ । सरकारले प्रभावित क्षेत्रमा उद्धार, राहत र क्षतिको विवरण संकलनलाई समेत प्राथमिकतामा राखेको जनाएको छ।