काठमाडौं– रसुवा जिल्लामा आएको आकस्मिक बाढीका कारण जनधनको अपूरणीय क्षति हुनुका साथै जलविद्युत आयोजनाहरू र अन्य भौतिक संरचनाहरूमा गम्भीर क्षति पुगेको छ । 

नेपाल विद्युत् प्राधिकरणले आज एक अत्यन्त जरुरी सूचना जारी गर्दै बाढीका कारण घर, सडक, पुल र विद्युत् आपूर्ति प्रणालीमा व्यापक क्षति पुगेको प्रारम्भिक विवरण सार्वजनिक गरेको हो ।

बाढीका कारण सो क्षेत्रमा रहेका नेपाल विद्युत् प्राधिकरणका उत्पादन, प्रसारण र वितरणसँग सम्बन्धित विभिन्न महत्त्वपूर्ण आयोजनाहरू ठप्प भएका छन् । 

प्राधिकरणका अनुसार रसुवागढी, चिलिमे, त्रिशुली ३ ‘ए’, त्रिशुली ३ ‘बी’ हब २२० के.भी. सवस्टेशन, त्रिशुली र देविघाट जलविद्युत केन्द्र एवम् विभिन्न वितरण संरचनाहरू क्षतिग्रस्त भएका छन् । ठूलो क्षतिसँगै सो क्षेत्रमा विद्युत् आपूर्ति पूर्ण रूपमा अवरुद्ध हुन पुगेको प्राधिकरणले जनाएको छ ।

प्राकृतिक प्रकोपका कारण प्रभावित तथा बेपत्ता भएका सुरक्षाकर्मी, राष्ट्रसेवक कर्मचारी र सर्वसाधारण नागरिकहरूको तत्काल खोज, उद्धार, राहत तथा पुनः स्थापनाका लागि प्राधिकरणले सम्बन्धित सबै पक्षलाई प्रभावकारी रूपमा परिचालित हुन र सहयोग गर्न प्राधिकरणले आग्रह गरेको छ ।